Azərbaycan News Agency

Ukrayna Prezidenti Volodimir Zelenski Rusiyanın dünən Krivoy Roqda həyata keçirdiyi hücumdan sonra axtarış-xilasetmə işlərinin davam etdiyini bildirib.

Zelenski ticarət mərkəzində başlayan və 9 min kvadratmetr əraziyə yayılan yanğının söndürüldüyünü, dağıntıların təmizlənməsi və axtarış işlərinə 7 bölgədən xilasedici qrupların və itlərlə axtarış qruplarının qatıldığını qeyd edib. O, hücum nəticəsində 16 nəfərin öldüyünü, 130 nəfərin yaralandığını, yaralılar arasında 23 uşağın olduğunu bildirib.

Zelenski Kiyevdə ballistik raket hücumları nəticəsində dəmir yolu infrastrukturunun zərər gördüyünü, bir nəfərin öldüyünü və bir nəfərin yaralandığını deyib. O, Zaporojyedə şəhər mikroavtobusuna FPV dronu ilə edilən hücum nəticəsində isə 3 nəfərin yaralandığını bildirib.

Zelenski Odessa, Dnepr, Xarkov, Donetsk, Sumı, Xerson, Çerniqov və Nikolayev bölgələrinin də hücumlara məruz qaldığını, yaşayış binaları, enerji və dəmir yolu infrastrukturu ilə mülki müəssisələrə zərər dəydiyini açıqlayıb.

Zelenski hava hücumundan müdafiənin kifayət qədər olmaması səbəbindən hər gün qarşısı alına biləcək insan itkilərinin yaşandığını bildirərək, ballistik raketlərə qarşı müdafiə vasitələri və digər raketlər üçün yeni tədarüklərin vacibliyini vurğulayıb.