Azərbaycan News Agency

Ukrayna Prezidenti Volodimir Zelenski Rusiyanın ölkənin enerji infrastrukturuna genişmiqyaslı hücumlar həyata keçirdiyini bildirib. Zelenski hücumlar zamanı müxtəlif bölgələrdə 15-dən çox mühüm elektrik enerjisi istehsalı və ötürülməsi obyektinin hədəf alındığını qeyd edib.

Zelenski enerji şirkətləri ilə birlikdə ziyanın aradan qaldırılması və enerji təchizatının bərpası istiqamətində işlərin davam etdiyini bildirib. Lutsk, Rivne, Jitomir, Vinnitsa, Şepetivka, Slavuta və Netişin ərazilərində vəziyyətin xüsusilə çətin olduğunu qeyd edən Zelenski, Xarkov, Kiyev və Dnipro bölgələrindəki enerji obyektlərinin də hücumlardan zərər çəkdiyini açıqlayıb.

Gecə ərzində yüzlərlə pilotsuz uçuş aparatı və raketdən istifadə edilib

Zelenski dünən saat 19:00-dan bu gün saat 07:00-dək enerji infrastrukturuna, şəhərlərə və yaşayış məntəqələrinə hücumlarda reaktiv və benzin mühərrikli 320-dən çox Şahed tipli pilotsuz uçuş aparatından istifadə edildiyini açıqlayıb. Zelenski hücumlarda dolaşan döyüş sursatları ilə yanaşı, qanadlı və ballistik raketlərin də istifadə olunduğunu bildirib.

Ukraynanın hava hücumundan müdafiə sistemlərinin çox sayda hücum vasitəsini zərərsizləşdirdiyini bildirən Zelenski, hücumların intensivliyi və davamlılığının enerji sektorunda ciddi nəticələrə səbəb olduğunu qeyd edib.

Zelenskidən beynəlxalq dəstək çağırışı

Zelenski Avropadakı tərəfdaşların Ukrayna üçün yeni dəstək paketləri hazırladığını bildirib. ABŞ-də baş verən hadisələrin də nəzərə alınmalı olduğunu vurğulayan Zelenski, Rusiyaya təzyiqin artırılması istiqamətində addımların əhəmiyyətinə diqqət çəkib.

Zelenski ABŞ-də Lindsi Qrem Qanunu kimi tanınan və onun sözlərinə görə Rusiyaya təzyiqi artırmaq məqsədi daşıyan qanunvericilik təşəbbüsünün diqqətdən kənarda qaldığını iddia edib. O, bu təşəbbüsün müharibəyə son qoymaq üçün Rusiyaya təzyiqi artıra biləcəyini bildirib.