Azərbaycan News Agency

Qazaxıstan Respublikası Xarici İşlər Nazirliyinin Almatı nümayəndəliyinin səfiri Janibek Abdraşov BMT Əhali Fondu (UNFPA), BMT Gənclər Ofisi və BMT İnkişaf Proqramının (UNDP) tərəfdaşlığı, həmçinin İtaliya hökumətinin dəstəyi ilə təşkil olunan "Gənclər Dəyişimin Katalizatoru kimi: Normativ Tərəqqidən Praktik Təsirə" mövzusunda Qlobal Strateji Gənclik, Sülh və Təhlükəsizlik Dialoqunun açılışında iştirak edərək çıxış edib.

Qazaxıstan Xarici İşlər Nazirliyinin açıqlamasına görə, səfir Abdraşov çıxışında BMT Təhlükəsizlik Şurasının 2250 saylı qətnaməsi çərçivəsində həyata keçirilən Gənclik, Sülh və Təhlükəsizlik gündəliyinin ilk on ilində əldə olunan nailiyyətləri qiymətləndirib.

Açıqlamada gündəliyin institusionallaşdırılmasının əhəmiyyəti vurğulanıb, Qazaxıstanın dövlət gənclər siyasəti sahəsində təcrübəsi, BMT qurumları ilə davam edən əməkdaşlığı və Almatıda yaradılan BMT-nin Mərkəzi Asiya və Əfqanıstan üzrə Dayanıqlı İnkişaf Məqsədləri Regional Mərkəzinin regional əməkdaşlıqdakı rolu ön plana çıxarılıb.