Azərbaycan News Agency

Türkiyənin xarici işlər naziri Hakan Fidan Ankarada Sudanın xarici işlər və beynəlxalq əməkdaşlıq naziri Mohieddin Salem ilə görüşüb.

Görüşün gündəliyinə toxunan Fidan bildirib: "Sudanla münasibətlərimizin siyasi, iqtisadi və ticarət ölçülərini ətraflı şəkildə müzakirə etdik. Ölkədəki münaqişələrin həllinə yönəlmiş səyləri dəstəkləməyə davam edəcəyimizi, sudanlı qardaşlarımızın humanitar ehtiyaclarının qarşılanmasına dair fəaliyyətimizi və Sudanın yenidən qurulması prosesində inkişaf yardımlarımızı davam etdirəcəyimizi vurğuladıq."

Fidan qeyd edib ki, görüşdə regional və qlobal məsələlər də müzakirə olunub: "Hörmətli həmkarımla, xüsusilə Afrika Buynuzu başda olmaqla, regiondakı inkişaflar və qlobal təhlükəsizlik məsələləri barədə geniş məsləhətləşmələr apardıq."

Fidan Türkiyənin qətiyyətli mövqeyini vurğulayaraq sözlərini belə yekunlaşdırıb: "Tarixi və köklü bağlara malik olduğumuz Sudanın müstəqilliyinin, suverenliyinin, birliyinin və ərazi bütövlüyünün qorunmasına dair prinsipial mövqeyimizi davam etdirəcək, münasibətlərimizi qarşılıqlı hörmət və bərabər tərəfdaşlıq əsasında daha da inkişaf etdirəcəyik."