Azərbaycan News Agency

CENTCOM ABŞ-ın İrana qarşı tətbiq etdiyi dəniz blokadasını pozduğunu iddia etdiyi Panama bayraqlı ticarət gəmisinin Oman körfəzində dayandırıldığını açıqlayıb.

CENTCOM-un açıqlamasında “Vela Nova” adlı gəminin İrandakı limanlardan birinə doğru hərəkət edərək ABŞ-ın İrana qarşı blokadasını pozmağa çalışdığı bildirilib. Gəminin sükan sisteminin sıradan çıxarıldığı qeyd olunan açıqlamada, mülki heyətin ABŞ qüvvələrinin xəbərdarlıqlarına əməl etməməsindən sonra ABŞ Hərbi Dəniz Qüvvələrinə məxsus MH-60 helikopterindən gəminin mühərrik bölməsinə 2 Hellfire raketinin atıldığı bildirilib.

Açıqlamada gəminin İrana doğru hərəkətinin dayandırıldığı qeyd edilib. CENTCOM bildirib ki, 11 avqust tarixinə olan məlumata görə, onun qüvvələri blokadanı yarmağa çalışan 55 ticarət gəmisinin istiqamətini dəyişdirib, 3 gəmini sıradan çıxarıb və 2 gəmiyə çıxıb.

CENTCOM Yaxın Şərqdə fəaliyyət göstərən ABŞ qüvvələrinin “yüksək hazırlıq vəziyyətində, ölümcül güc tətbiq etməyə hazır və hərəkətə keçməyə hazır” olduğunu bildirib.