Azərbaycan News Agency

Avropa İttifaqı (Aİ) Efiopiyada qarşıdurmaların kəskinləşməsi və Efiopiya ilə Eritreya arasında gərginliyin artması ilə bağlı açıqlama yayıb.

Aİ-nin açıqlamasında mövcud vəziyyətin daha genişmiqyaslı regional münaqişəyə səbəb ola biləcəyi və bunun Afrika Buynuzu boyunca sülh və sabitlik üçün ciddi nəticələr doğura biləcəyi bildirilib.

Bütün cəbhələrdə gərginliyin dərhal azaldılmasına çağıran Aİ tərəflərdən gərginliyi daha da artıra biləcək hərəkət və ritorikadan çəkinmələrini istəyib. Afrika İttifaqı çərçivəsində Düşmənçiliklərin Daimi Dayandırılması haqqında Sazişin tərəflərinin sazişin tam icrasına sadiqliklərini yeniləməli olduqları qeyd edilib.

Açıqlamada beynəlxalq humanitar hüquqa riayət olunmasının məcburi olduğu vurğulanaraq mülki şəxslərin bütün hallarda qorunmasının və humanitar yardımın maneəsiz çatdırılmasının təmin edilməsinin vacibliyi qeyd olunub.

Bütün dövlətlərin suverenliyinə və ərazi bütövlüyünə hörmət edilməli olduğunu bir daha vurğulayan Aİ xarici aktorları müdaxilədən çəkinməyə, daha çox gərginliyin qarşısını almaq üçün təsirlərindən istifadə etməyə və siyasi həll yolları ilə diplomatiyanı irəli aparmağa çağırıb.

Aİ Afrika Buynuzunda regional sabitliyə, dinc əməkdaşlığa və iqtisadi inteqrasiyaya sadiqliyini davam etdirdiyini bildirərək mənalı dialoqun qurulması və münaqişələrin sülh yolu ilə həllinə yönəlmiş diplomatik səyləri dəstəkləməyə hazır olduğunu açıqlayıb.