Azərbaycan News Agency

İran Xarici İşlər Nazirliyinin sözçüsü İsmayıl Bəqayi açıqlamasında ABŞ administrasiyasının tamahkarlıq və təkəbbürlə hərəkət edərək İrana qarşı qanunsuz müharibəyə başladığını iddia edib. Bəqayi ABŞ-nin hesablamalarının və strateji proqnozlarının uğursuz olduğunu, bunun əsas səbəbinin isə İranı, İran xalqının müqavimətini, qətiyyətini və milli qürurunu yanlış anlaması olduğunu bildirib.

ABŞ xalqının administrasiyaya açıq mesaj verdiyini qeyd edən Bəqayi hazırkı siyasətin davam etdiriləcəyi təqdirdə yanlış hesablamaların nəticələrinin daha ağır olacağı barədə xəbərdarlıq edib. O, İrana hücumun qələbə deyil, məğlubiyyət gətirəcəyini və ölkəsinin təhdid və ya təcavüz yolu ilə təslim olmağa məcbur edilə bilməyəcəyini vurğulayıb.