Beynəlxalq Manqrov Mərkəzi Şençjendə fəaliyyətə başladı
Manqrovların qorunması sahəsində əməkdaşlıq üzrə dünyanın ilk hökumətlərarası təşkilatı olan Beynəlxalq Manqrov Mərkəzi bu gün rəsmi olaraq fəaliyyətə başlayıb.
Mərkəz Asiya, Afrika və Amerika qitələri daxil olmaqla dünyanın əsas manqrov ərazilərini əhatə edən 8 üzv dövlətdən və 13 imzaçı ölkədən ibarətdir.
Çin 2022-ci ilin noyabr ayında keçirilən Ramsar Bataqlıq Əraziləri Konvensiyasının Tərəflər Konfransının 14-cü iclasında Şençjen şəhərində Beynəlxalq Manqrov Mərkəzinin yaradılmasını təklif etmişdi.
İlk qrupda yer alan 18 potensial üzv dövlətin nümayəndələri 2024-cü ilin noyabrında Şençjendə Beynəlxalq Manqrov Mərkəzinin yaradılması haqqında sazişi imzalamışdılar. Saziş 2026-cı ilin iyun ayında rəsmi olaraq qüvvəyə minib.
Çin Təbii Sərvətlər Nazirliyi və Milli Meşəçilik və Otlaq Administrasiyasının məlumatına görə, Çində manqrov meşələrinin sahəsi XXI əsrin əvvəlləri ilə müqayisədə 44 faiz artaraq 31 min 700 hektara çatıb. Çin dünyada manqrov meşələrinin davamlı şəkildə genişləndiyi azsaylı ölkələrdən biridir.
UNESCO hər il iyulun 26-sını "Manqrov Ekosisteminin Mühafizəsi üzrə Beynəlxalq Gün" kimi qeyd edir.
Manqrov meşələri tropik və subtropik sahillərdə duzlu və ya yarı duzlu sularda bitən ağac və kollardan ibarətdir. Bu meşələr sahilləri eroziya və fırtınalardan qoruyur, eyni zamanda çoxsaylı dəniz canlıları və quş növləri üçün yaşayış mühiti yaradır.
Azərbaycan İnformasiya Agentliyi
Facebook
Tweeter
Whatsapp
