Azərbaycan News Agency

İsrail hökuməti Baş nazir Benyamin Netanyahunun tam və ya qismən məcburi əməklə istehsal olunan məhsulların ölkəyə idxalının qadağan edilməsi ilə bağlı təklifini qəbul edib.

İsrail Baş nazirinin Ofisinin açıqlamasına görə, İqtisadiyyat və Sənaye nazirinə beynəlxalq hüquqda qəbul olunmuş standartlara uyğun olaraq məcburi əməklə istehsal olunan məhsulların idxalını qadağan edən qaydaların hazırlanması tapşırılıb.

Açıqlamada bildirilib ki, Baş nazirin Milli İqtisadi Şurasının rəhbərliyi altında fəaliyyət göstərəcək nazirliklərarası qrup qaydaların tətbiqi və nəzarət mexanizmini hazırlayacaq və bu sənəd 90 gün ərzində hökumətin təsdiqinə təqdim olunacaq.

Qərara əsasən, məcburi əməklə istehsal olunan məhsulların müəyyən edilməsi üçün peşəkar meyarlar hazırlanacaq, səlahiyyətli qərarverici orqan müəyyənləşdiriləcək, bildiriş sistemi, etiraz və araşdırma mexanizmləri yaradılacaq.

İsrail hökuməti bildirib ki, bu addım insan alveri və məcburi əməklə mübarizə üzrə öhdəliklərini gücləndirmək, beynəlxalq ticarət standartlarına uyğunluğu artırmaq və İsrail ixracatçılarının beynəlxalq bazarlardakı mövqeyini dəstəkləmək məqsədi daşıyır.