Azərbaycan News Agency

Bolqarıstanın daxili işlər naziri Ivan Demerdjiyev Strumyanidə baş verən hadisənin bütün aspektlərinin hərtərəfli araşdırılması üçün Müfəttişliyə tapşırıq verdiyini və görüləcək tədbirlərin araşdırmanın nəticələrinə əsasən müəyyən ediləcəyini açıqlayıb.

Demerdjiyev hadisə yerində olan polis əməkdaşlarının və onların rəhbərlərinin davranışını yetərli hesab etmədiyini bildirərək, bu səbəbdən təcili tədbirlər gördüyünü deyib. Daşqın fəlakətindən sonra yaranan mürəkkəb vəziyyətdə regional direktorun hadisə yerində olmalı olduğunu qeyd edən Demerdjiyev, məsul şəxsin vəziyyəti yaxından araşdırmasının, insanların narahatlığını görməsinin və müdaxilə etməsinin vacibliyini vurğulayıb.

Demerdjiyev həmçinin regional direktorun öz əməkdaşlarına şəxsən rəhbərlik etməli olduğunu bildirib və hadisədə iştirak edən polis əməkdaşlarında belə hallarda istifadə olunmalı bədən kameralarının olmadığını deyib.

Sözügedən hadisədə saxlanılma üçün hüquqi əsasın olmadığını qeyd edən Demerdjiyev, regional direktorun hadisə barədə nə Baş katibə, nə də özünə məlumat verdiyini bildirib.

Demerdjiyev həmçinin sözügedən şəxsin daha əvvəl də polislə qarşılaşdığını və nikahdankənar birlikdə yaşadığı şəxsin öldürülməsi hadisəsi ilə əlaqədar köməkçilik və cinayəti gizlətmə şübhəsi ilə saxlanıldığını bildirib.