Azərbaycan News Agency

2022-ci ildə prezidentlik müddəti bitəndən sonra ilk dəfə ictimaiyyət qarşısına çıxan 79 yaşlı Duterte, "narkotiklərə qarşı mübarizə" dövründə 30 minə yaxın insanın öldüyünü, lakin bu mövzuda "heç bir üzr və bəraət" təqdim etməyəcəyini dedi.

Duterte deyib: "Respublika Prezidenti olaraq mənim borcum ölkəni və Filippin xalqını qorumaq idi. Siyasətimi sorğulamayın, çünki üzr istəmirəm, bəraət axtarmıram. Nə etməliydimsə, etdim, inanın ya inanmayın, bunu ölkəm üçün etdim". Duterte məhkəmə zalına çubuqla girdi və iclas boyu senatorları qınayaraq bəzən sərt ifadələr işlətdi.

Filippində 2016-cı ilin iyulundan 2019-cu ilin martına qədər 12 ilə 30 min arasında insanın öldüyü ehtimal edilir. Qurbanların çoxu yoxsul şəhər bölgələrindən gələn gənc kişilər idi və küçədə və ya evlərində güllələnərək öldürülmüşdü.

Duterte, prezidentlik və merlik dövründə ölkənin cənubundakı Davaoda baş verən qətllərlə əlaqədar Beynəlxalq Cinayət Məhkəməsi (BCM) tərəfindən insanlığa qarşı cinayət törətməkdə ittiham olunaraq təhqiqat altındadır. Cari Prezident Ferdinand Markos Jr. əvvəllər məhkəmə ilə əməkdaşlıq etməyəcəyini bildirmişdi, lakin son aylarda Duterte və Marcos ailələri arasında əlaqələr pozulub və onun mövqeyini dəyişməsi mümkündür.

Duterte polisə şübhəliləri öldürmək səlahiyyətini verdiyini rədd edərək, milli polis rəislərinə qanunsuz edam əmri vermədiyini bildirdi. Bununla belə, prezident olmamışdan əvvəl Davao şəhərinin meri olarkən yeddi "qanqsterdən" ibarət bir ölüm dəstəsi yaratdığını dedi.

Duterte dedi: "İstəsəniz, indi etiraf edə bilərəm. Mənim yeddi nəfərdən ibarət ölüm dəstəm vardı, amma onlar polis deyildi, elə özləri də qanqster idi".