Azərbaycan News Agency

Fələstin Xarici İşlər Nazirliyi bildirib ki, elektrik enerjisinin kəsilməsi və Fələstin xalqına yardımın qarşısının alınması soyqırım, köç və ilhaq cinayətlərinin davamıdır.

Nazirliyin bəyanatında İsrail Energetika Nazirliyinin Qəzza zolağında elektrik enerjisinin kəsilməsi qərarı kəskin şəkildə pislənilib: "Biz bunu Qəzzada bütün həyat səviyyələrində xalqın üzləşdiyi soyqırımı, köç və humanitar fəlakəti daha da dərinləşdirən bir addım kimi qiymətləndiririk. Xüsusilə, işğalın iki milyondan çox fələstinliyə humanitar yardımın çatdırılmasının qarşısını almağa davam etməsi etnik təmizləmənin ən dəhşətli formalarına səbəb olur."

Nazirlik əlavə edib:

"Nazirlik hesab edir ki, beynəlxalq cəmiyyətin ikili standartları, BMT qərarlarının və Beynəlxalq Ədalət Məhkəməsinin müvəqqəti tədbirlərinin icra olunmaması işğalçı dövləti xalqımıza qarşı qeyri-qanuni təcrübələrini daha da artırmağa həvəsləndirir. Nazirlik xalqımıza beynəlxalq müdafiənin təmin edilməsi, yardım və xilasetmə fəaliyyətlərinin davam etdirilməsi və İsrail hökumətinin işğalçı qüvvə kimi öz öhdəliklərini yerinə yetirməyə məcbur edilməsi üçün təcili beynəlxalq müdaxilə tələb edir."