Azərbaycan News Agency

Fələstinin Xarici İşlər və Xaricdə Yaşayan Vətəndaşlarla İş üzrə Nazirliyi Səudiyyə Ərəbistanının paytaxtı Ər-Riyaddakı Kral Xalid Hava Limanına hücumlar nəticəsində fələstinli Talal əl-Daninin və Səudiyyə Ərəbistanı vətəndaşlarının həyatını itirməsi ilə bağlı başsağlığı mesajı yayıb.

Nazirlik Talal əl-Dani ilə yanaşı, hücumlarda həyatını itirən Səudiyyə Ərəbistanı və digər ölkələrin vətəndaşları ilə bağlı kədərini ifadə edərək, həlak olanların ailələrinə başsağlığı verib.

Fələstinin Ər-Riyaddakı səfirliyinin nazirliklə koordinasiyalı şəkildə Talal əl-Daninin nəşi ilə bağlı zəruri prosedurları həyata keçirdiyi və ailəsinə dəstək göstərilməsi üçün Səudiyyə Ərəbistanının səlahiyyətli qurumları ilə əlaqə saxladığı bildirilib.

Açıqlamada Fələstin və Səudiyyə Ərəbistanının yaşanan acını bölüşdüyü vurğulanaraq, hücumlarda həyatını itirən dörd Səudiyyə Ərəbistanı vətəndaşı ilə bağlı ölkə rəhbərliyinə və xalqına başsağlığı çatdırılıb.

Nazirlik Səudiyyə Ərəbistanını hədəf alan hücumları pisləyərək, bu əməllərin beynəlxalq hüquq normalarını açıq şəkildə pozduğunu və vətəndaşlığından asılı olmayaraq mülki şəxslərin həyatını və təhlükəsizliyini heçə saydığını bildirib. Fələstinin Səudiyyə Ərəbistanının təhlükəsizliyini, suverenliyini və sabitliyini təhdid edən hər cür cəhdə qarşı ölkə ilə tam həmrəy olduğu vurğulanıb.

Açıqlamada həmçinin başsağlığı mesajları göndərən Səudiyyə Ərəbistanı rəsmilərinə və xalqına təşəkkür edilib, Səudiyyə Ərəbistanı xarici işlər nazirinin müavini mühəndis Vəlid əl-Xureyci xüsusi olaraq qeyd olunub.