Azərbaycan News Agency

Fələstin Xarici İşlər və Qürbətçilər Nazirliyi fələstinli məhbusların vəziyyəti və İsrail həbsxanalarındakı səhiyyə xidmətləri ilə bağlı müxtəlif beynəlxalq təşkilatlara təcili məktublar göndərdiyini açıqlayıb.

Nazirliyin açıqlamasına görə, məktublar BMT-nin xüsusi mexanizmləri, İnsan Hüquqları üzrə Ali Komissarlıq, İnsan Hüquqları Şurası və Ümumdünya Səhiyyə Təşkilatı da daxil olmaqla aidiyyəti beynəlxalq qurumlara göndərilib.

Açıqlamada fələstinli məhbuslara qarşı ciddi pozuntulara və səhiyyə xidmətlərinə çıxışda yaşanan problemlərə diqqət çəkilərək, məhbusların ölümü ilə bağlı halların müstəqil şəkildə araşdırılması tələb olunub.

Nazirlik həmçinin həbsdə olduğu müddətdə müxtəlif pozuntulara və səhiyyə xidmətlərindəki fasilələrə məruz qaldığı bildirilən 15 yaşlı Məhəmməd Musa Hamidin vəziyyətinə diqqət çəkib.

Açıqlamada bəzi məhbusların zəruri dərman və müalicələrə çıxışının məhdudlaşdırıldığı, tibbi müayinə və konsultasiyaların gecikdirildiyi, xəstəxanalara göndərişlərin əngəlləndiyi, ixtisaslaşmış müalicə və reabilitasiya xidmətlərinə çıxışda problemlərin yaşandığı iddia olunub.