Azərbaycan News Agency

Fələstin Xarici İşlər və Mühacirlər Nazirliyi qış mövsümünün başlaması ilə Qəzza zolağında dərinləşən humanitar və ekoloji fəlakətlə əlaqədar beynəlxalq ictimaiyyəti, Birləşmiş Millətlər Təşkilatını (BMT) və humanitar yardım təşkilatlarını təcili müdaxiləyə çağırıb.

Nazirliyin açıqlamasında son saatlarda yağan ilk yağışların Qəzzadakı humanitar vəziyyətin miqyasını üzə çıxardığı bildirilib. Açıqlamada deyilir: “İlkin hesablamalara görə, on minlərlə insanın sığındığı 70 mindən çox çadırı su basıb. İsrailin hücumları və bombardmanları nəticəsində zədələnmiş bəzi binalar və divarlar uçub, mülki şəxslər arasında yaralananlar olub.” Nazirlik baş verənlərin yalnız əlverişsiz hava şəraiti ilə bağlı olmadığını, infrastrukturun dağıdılmasının və humanitar yardımların çatdırılmasına maneələrin fəlakəti daha da ağırlaşdırdığını vurğulayıb.

Açıqlamada Qəzzada təxminən 2 milyon fələstinlinin 270 minə yaxın çadır və sığınacaq məntəqəsində ağır humanitar şəraitdə yaşadığı, çadırların 60-85 faizinin köhnəldiyi və istifadəyə yararsız hala düşdüyü qeyd olunub. Həmçinin 400 mindən çox məcburi köçkünün sel və daşqın riski olan və ya dəniz sahilinə yaxın təhlükəli ərazilərdə yerləşdiyi bildirilib. Kanalizasiya və yağış sularının axıdılması sistemlərinə ciddi ziyan dəyməsinin riskləri artırdığı, uşaqların, yaşlıların və xəstələrin qış geyimləri, ədyal, döşək və təhlükəsiz istilik vasitələrindən məhrum olduğu vurğulanıb.

Fələstin Xarici İşlər Nazirliyi beynəlxalq ictimaiyyətə müraciət edərək İsrailə bütün sərhəd-keçid məntəqələrini açması və humanitar yardımların maneəsiz çatdırılmasını təmin etməsi üçün təzyiq göstərilməsini istəyib. Açıqlamada həmçinin su və kanalizasiya sistemlərinin işləməsi üçün yanacaq və avadanlıqların göndərilməsi, müvəqqəti sığınacaqların və yağışa davamlı çadırların təmin olunması, qış geyimləri və ədyalların çatdırılması, səhiyyə xidmətləri üçün dərman və tibbi ləvazimatların verilməsi, eləcə də bələdiyyələrə və mülki müdafiə qruplarına logistik dəstəyin göstərilməsi tələb edilib.

Nazirlik BMT Təhlükəsizlik Şurasının 2720 və 2803 saylı qətnamələrinin həyata keçirilməsinin vacibliyini vurğulayaraq humanitar yardım çağırışlarının konkret tədbirlərə çevrilməsini istəyib.