Azərbaycan News Agency

ABŞ Mərkəzi Komandanlığı (CENTCOM) İranın qabaqcıl silahları və sanksiyalara məruz qalan materialları quru yolları vasitəsilə daşımasının qarşısını almaq məqsədilə təxminən 20 nəfərdən ibarət yeni əməliyyat qrupu yaradıb.

CENTCOM komandanı admiral Bred Kuperin göstərişi ilə noyabrın 7-də yaradılan Iron Gate Əməliyyat Qrupu ABŞ-nin Florida ştatının Tampa şəhərində fəaliyyət göstərəcək.

Əməliyyat qrupu İranın quru sərhədləri və Xəzər dənizi vasitəsilə qabaqcıl silah sistemlərinin, ikili təyinatlı texnologiyaların, sanksiyalara məruz qalan materialların və qanunsuz gəlirlərin daşınmasının qarşısını almaq üçün ABŞ-nin digər qurumları ilə koordinasiyalı fəaliyyət göstərəcək. Kuper bildirib ki, təşəbbüs İranın terrorizmi maliyyələşdirmək, silah zavodlarını yenidən qurmaq və hərbi potensialını bərpa etmək imkanlarını məhdudlaşdırmağı hədəfləyir.

CENTCOM-un açıqlamasında ABŞ-nin dəniz blokadası nəticəsində son aylarda İranın 25 milyard dollardan çox dəyərində xam neft ixracının qarşısının alındığı iddia edilib. İran limanlarına daxil olan və bu limanlardan çıxan gəmilərin yoxlanılmasının davam etdiyi bildirilib.