Azərbaycan News Agency

Fələstinin Xarici İşlər və Mühacirlər Nazirliyi və Əmək Nazirliyi tərəfindən fələstinli işçilərin üzləşdiyi problemlərə beynəlxalq diqqəti cəlb etmək və diplomatik təşəbbüsləri artırmaq məqsədilə xaricdə fəaliyyət göstərən Fələstin səfirləri üçün birgə məlumatlandırma toplantısı təşkil edilib. Toplantıda xarici işlər və mühacirlər naziri Varsen Ağabekyan Şahin və əmək naziri İnas əl-Attari iştirak ediblər.

Toplantıda çıxış edən əl-Attari fələstinli işçilərin üzləşdiyi böhranın nəticələri, onların iş yerlərinə çıxışının məhdudlaşdırılması səbəbindən yaranan iqtisadi və sosial itkilər, həmçinin Əmək Nazirliyinin işçi hüquqlarını qorumaq və məşğulluq imkanlarını genişləndirmək istiqamətində gördüyü işlər barədə məlumat verib.

Fələstinin diplomatik nümayəndəliklərinin hökumət və milli siyasətlərin konkret addımlara çevrilməsində rol oynamasının vacibliyi vurğulanıb. Bu çərçivədə beynəlxalq dəstəyin səfərbər edilməsi, fələstinli işçiləri və Fələstin iqtisadiyyatını dəstəkləyən tərəfdaşlıqların gücləndirilməsi məqsədilə diplomatik təşəbbüslərin intensivləşdirilməsinə çağırış edilib.

Xarici işlər və mühacirlər naziri Şahin də fələstinli işçilərin mövcud vəziyyətinin sənədləşdirilmiş məlumatlar əsasında beynəlxalq ictimaiyyətə çatdırılmasında səfirliklərin və diplomatik nümayəndəliklərin rolunun əhəmiyyətini vurğulayıb.