Azərbaycan News Agency

İsrail Müdafiə Qüvvələri (IDF) Hizbullahın təhlükəsizlik bölgəsində İsrail qüvvələrinə qarşı həyata keçirdiyi fəaliyyətə cavab olaraq keçirilən əməliyyatda təşkilatın “Bədr” bölməsində yüksək səviyyəli komandir kimi fəaliyyət göstərən Əbu Həsən Alaanın zərərsizləşdirildiyini açıqlayıb.

IDF-nin açıqlamasına görə, əməliyyat dünən Deyr əz-Zəhrani bölgəsində keçirilib. Açıqlamada Əbu Həsən Alaanın Hizbullahın təhlükəsizlik bölgəsində İsrail Müdafiə Qüvvələrinə qarşı fəaliyyətlərinə cavab tədbiri çərçivəsində hədəf alındığı bildirilib.

İsrail ordusu Alaanın zərərsizləşdirilməsinin Hizbullahın “Bədr” bölməsinin idarəetmə qabiliyyətinə zərbə vurduğunu iddia edib.

Açıqlamada həmçinin “Radvan Qüvvəsi”nin tərkibində batalyon komandiri kimi fəaliyyət göstərən Əli Smir əl-Hac Həsənin də daha əvvəl Ansardakı qərargahda hədəf alınaraq zərərsizləşdirildiyi bildirilib.

IDF Hizbullahın İsrail vətəndaşlarına və İsrail qüvvələrinə qarşı hücumlarına icazə verməyəcəyini bildirərək, təhdidlərin aradan qaldırılmasına yönəlmiş əməliyyatların davam edəcəyini açıqlayıb.