Azərbaycan News Agency

CCTV-nin məlumatına görə, İranın əsas hərbi komandanlıq mərkəzlərindən biri olan Xatəmül-Ənbiya Mərkəzi Qərargahı bildirib ki, ticarət gəmiləri və neft tankerləri İran Silahlı Qüvvələrinin icazəsi və nəzarəti olmadan Hörmüz boğazından təhlükəsiz keçə bilməz.

Qərargahın sözçüsü İbrahim Zülfikari İran mediasında yayımlanan video müraciətində Hörmüz boğazının əvvəlki kimi İranın tam nəzarəti və idarəsi altında olduğunu bildirib.

Zülfikari ABŞ-ın gəmilərin Hörmüz boğazından normal şəkildə keçdiyi barədə açıqlamalarını “həqiqətə uyğun olmayan” adlandırıb. ABŞ-ın bölgədəki hərbi fəaliyyətlərini izlədiklərini bildirən Zülfikari İranın milli suverenliyinə və maraqlarına yönəlmiş təhdidlərə cavab verəcəyini qeyd edib.

Açıqlama ABŞ Prezidenti Donald Trampın sosial media hesabında ABŞ-ın Hörmüz boğazı üzərində “tam nəzarət” əldə etdiyini iddia etməsindən sonra verilib.

İran 28 fevralda İsrail və ABŞ-ın İran ərazisinə birgə hücumlarından sonra Hörmüz boğazındakı tədbirlərini sərtləşdirmiş və İsrailə və ABŞ-a məxsus və ya bu ölkələrlə əlaqəli gəmilərin təhlükəsiz keçidinə mane olmuşdu.