Azərbaycan News Agency

Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi Kallas İtaliyanın paytaxtı Romada bir sıra görüşlər keçirdiyini açıqlayıb.

Kallas sosial media hesabında verdiyi açıqlamada İtaliyanın Aİ missiya və əməliyyatlarına, o cümlədən Qırmızı dənizdəki dəniz əməliyyatı Aspides-ə verdiyi töhfənin mühüm olduğunu vurğulayaraq italyan həmkarlarına təşəkkür edib.

Kallas İtaliyanın xarici işlər naziri Antonio Tajani ilə görüşündə Rusiyanın Ukraynaya qarşı müharibəsini və Rusiyanın Qara dənizdə taxıl daşıyan gəmilərə hücumlarının qlobal ərzaq təhlükəsizliyinə təsirini müzakirə etdiklərini bildirib. O, həmçinin Livan Silahlı Qüvvələrinin gücləndirilməsinə yönəlmiş yeni Aİ missiyasına hazırlıqları müzakirə etdiklərini qeyd edib.

Kallas İtaliyanın müdafiə naziri Guido Crosetto ilə görüşündə qlobal ticarətin daha yaxşı qorunması məqsədilə Aspides əməliyyatının daha çox gəmi ilə gücləndirilməsinə təcili ehtiyac olduğunu müzakirə etdiklərini bildirib.

Görüşdə, həmçinin artan hibrid təhdidlərə qarşı Avropanın daha güclü cavab verməsi və Avropanın müdafiə hazırlığının gücləndirilməsi məsələləri nəzərdən keçirilib.