Azərbaycan News Agency

İsveçrənin xarici işlər naziri İqnazio Kassis Moldovanın Baş nazir müavini və xarici işlər naziri Mixai Popşoy, ATƏT-in Baş katibi Feridun H. Sinirlioğlu və Avropa Şurasının Baş katibi Alen Berse ilə səmərəli görüş keçirdiklərini bildirib.

Görüşdə müzakirə olunan məsələlər barədə məlumat verən Kassis deyib: “Müzakirələrimizdə Ukraynaya dəstək, seçki bütövlüyünün qorunması və xarici informasiya manipulyasiyasına qarşı mübarizə də daxil olmaqla, Avropada təhlükəsizlik və demokratiya ilə bağlı aktual çağırışlar müzakirə olundu.”

Təşkilatlar arasında koordinasiyanın əhəmiyyətini vurğulayan Kassis bildirib: “Bundan əlavə, ATƏT ilə Avropa Şurası arasında əməkdaşlığın gücləndirilməsi, təkrarlanan işlərin qarşısının alınması və sinerjinin yaradılması barədə razılığa gəldik.”

Kassis əlavə edib: “Beynəlxalq təşkilatlar daha effektiv, daha praktik və vətəndaşlarımız üçün daha görünən olmalıdır.”