Azərbaycan News Agency

Rusiya Federasiyası ilə Cənub-Şərqi Asiya Dövlətləri Assosiasiyası (ASEAN) arasında keçirilən Rusiya-ASEAN Sammitindən sonra “Kazan Bəyannaməsi 2026” qəbul edilib.

Kazan Bəyannaməsi 2026 ilə tərəflər 35 illik münasibətləri “müxtəliflik içində birlik” prinsipi əsasında inkişaf etdirmək və strateji tərəfdaşlığı gücləndirmək öhdəliyini təsdiqləyiblər.

Bəyannamədə Asiya-Sakit Okean, Hind Okeanı və Avrasiya regionlarında sülhün, təhlükəsizliyin və sabitliyin dəstəklənməsi məqsədilə ASEAN mərkəzli regional təhlükəsizlik arxitekturasının qorunmasının vacibliyi vurğulanıb.

Sənəddə Şərqi Asiya Sammiti, ASEAN Regional Forumu və ASEAN Müdafiə Nazirləri Plus Toplantısı (ADMM-Plus) kimi mexanizmlər vasitəsilə əməkdaşlığın genişləndirilməsi qərara alınıb.

Tərəflər həmçinin beynəlxalq hüquq çərçivəsində dəniz təhlükəsizliyi sahəsində, o cümlədən naviqasiya azadlığı, mübahisələrin sülh yolu ilə həlli, piratçılığa qarşı mübarizə və kritik dəniz infrastrukturunun qorunması istiqamətlərində əməkdaşlığın inkişaf etdirilməsi barədə razılığa gəliblər.

Bəyannamədə səhiyyə təhlükəsizliyi, biotəhlükəsizlik, iqlim dəyişikliyi və kibercinayətkarlıqla mübarizə sahələrində potensialın artırılması və məlumat mübadiləsinin genişləndirilməsi də nəzərdə tutulur.

İqtisadi sahədə ticarət, investisiya, enerji, ərzaq təhlükəsizliyi, nəqliyyat, rəqəmsallaşma, elm, texnologiya və süni intellekt sahələrində əməkdaşlığın genişləndirilməsi hədəflənir.

Sənəddə həmçinin ASEAN-ın Avrasiya İqtisadi İttifaqı (EAEU) və Şanxay Əməkdaşlıq Təşkilatı (SCO) ilə münasibətlərinin dəstəklənməsinə dair müddəalar yer alır.

Mədəni əməkdaşlıq çərçivəsində isə turizm, incəsənət, idman və mədəni irsin qorunmasına yönəlmiş fəaliyyətlərin təşviq olunması qərara alınıb.