Azərbaycan News Agency

Amerika Birləşmiş Ştatlarının (ABŞ) Yaxın Şərq üzrə xüsusi nümayəndəsi Steve Witkoff Rusiyada dörd ildən çox saxlanılan keçmiş ABŞ dəniz piyadası Robert Gilmanın azad edilərək ABŞ-yə qayıtdığını açıqlayıb.

Witkoff Gilmanın ailəsinə qovuşduğunu və ehtiyac duyduğu tibbi yardımı ala biləcəyini bildirib. Gilmanı “vətənpərvər” adlandıran Witkoff keçmiş ABŞ dəniz piyadasının ölkəsinə şərəflə xidmət etdiyini qeyd edib.

Gilmanın qayıdışını ABŞ Prezidenti Donald Trumpın xaricdə saxlanılan amerikalıları ölkəyə qaytarmaq əzminin daha bir göstəricisi kimi qiymətləndirən Witkoff, Trumpın rəhbərliyi dövründə Marc Fogel və Ksenia Karelinanın da Rusiyadan ABŞ-yə qaytarıldığını xatırladıb.

Witkoff bildirib ki, Trumpın göstərişi ilə dövlət katibi Marco Rubio, Adam Boehler, Sebastian Gorka, Jared Kushner və özü Gilmanın azad edilməsi üçün sıx əməkdaşlıq ediblər.

Açıqlamada həmçinin Rusiya Prezidenti Vladimir Putinə Gilmanı humanitar səbəblərlə əfv etdiyinə və proses boyunca göstərdiyi şəxsi diqqətə görə təşəkkür edilib.

Witkoff ABŞ administrasiyasının xaricdə saxlanılan bütün amerikalıların təhlükəsiz şəkildə ölkəyə qayıtması üçün fəaliyyətini davam etdirəcəyini bildirərək mesajını “Evə xoş gəldin, Robert” sözləri ilə tamamlayıb.