Azərbaycan News Agency

Avropa İttifaqının (Aİ) Genişlənmə üzrə komissarı Marta Kos genişlənmə prosesindəki dinamikanın qorunmasına sadiq olduqlarını vurğulayaraq, Cənubi Qafqaz səfərindən sonra ticarət və enerji marşrutlarının şaxələndirilməsinin əhəmiyyətinə diqqət çəkib.

İrlandiya hökuməti ilə birgə fəaliyyət baxışını bölüşən Kos deyib: "Şura Sədrliyinin başlaması ilə əlaqədar İrlandiyada olmaqdan məmnunam. İrlandiya Sədrliyi ilə birlikdə genişlənmə prosesində güclü irəliləyiş tempini qorumağı və namizəd ölkələrimizin üzvlük yolunu dəstəkləməyi səbirsizliklə gözləyirik."

Yaxın zamanda həyata keçirdiyi regional səfərin iqtisadi və diplomatik nəticələrinə toxunan komissar Marta Kos bildirib: "Türkiyə, Azərbaycan və Ermənistandan yenicə qayıtmışam. Orada bağlantı sahəsindəki əməkdaşlığımızı növbəti mərhələyə çıxardıq. Bu, Cənubi Qafqazda davamlı sülhü təmin etməklə yanaşı, Avropa ilə Asiya arasında ticarət və enerji marşrutlarının şaxələndirilməsinə kömək edə bilər."

Strateji infrastruktur layihələrinin Aİ-nin inkişaf hədəflərini tamamladığını vurğulayan Kos sözlərini belə yekunlaşdırıb: "Genişlənmə və bağlantılar birlikdə irəliləyir. Hər ikisi Avropanın sabitliyinə, rifahına və təhlükəsizliyinə töhfə verir."