Azərbaycan News Agency

Rusiyanın xarici işlər naziri Sergey Lavrov Rusiya ilə Körfəz Əməkdaşlıq Şurasına (KƏŞ) üzv ölkələr arasında iqtisadi və diplomatik əlaqələrin inkişafına önəm verdiklərini bildirib.

Lavrov oktyabrın 18-də Bəhreynin paytaxtı Manamada keçirilən Rusiya-KƏŞ Strateji Dialoqunun doqquzuncu Nazirlər Toplantısının açılışındakı çıxışında Rusiya ilə KƏŞ ölkələri arasında ümumi ticarət dövriyyəsinin 2025-ci ildə 45 faiz artdığını açıqlayıb.

KƏŞ-in yaradılmasının 45-ci ildönümünün qeyd olunduğunu xatırladan Lavrov Körfəz ölkələri ilə çoxşaxəli və qarşılıqlı faydaya əsaslanan əlaqələrin gücləndirilməsinin Rusiyanın xarici siyasət prioritetləri sırasında olduğunu bildirib. Strateji dialoq mexanizminin təxminən 15 il əvvəl Əbu-Dabidə yaradıldığını qeyd edən Lavrov bu formatın qlobal və regional gündəmdəki həssas məsələlərin müzakirəsinə, eləcə də ticarət, iqtisadi, mədəni və humanitar əlaqələrin inkişafına töhfə verdiyini vurğulayıb.

Rusiya ilə KƏŞ üzvü olan ölkələr arasında yüksək səviyyəli təmasların və xarici siyasət sahəsində koordinasiyanın davam etdiyini bildirən Lavrov hökumətlərarası komissiyaların və işgüzar şuraların da konkret nəticələrin əldə olunmasına kömək etdiyini qeyd edib. Lavrov 2023-2028-ci illəri əhatə edən Strateji Dialoqun Birgə Fəaliyyət Planının həyata keçirilməsi istiqamətində görülən işlərin ikitərəfli və çoxtərəfli əməkdaşlığı dəstəklədiyini bildirib.

Regional sabitliyin iqtisadi əməkdaşlıq üçün əhəmiyyətini vurğulayan Lavrov toplantıda xüsusilə Körfəz ətrafındakı hadisələr olmaqla, Yaxın Şərqdəki problemlərin ətraflı müzakirə ediləcəyini gözlədiyini deyib.

Lavrov Körfəzdəki hərbi-siyasi böhranın ABŞ və İsrailin İrana qarşı hücumlarından sonra yarandığını iddia edib. O, Rusiyanın regionda genişmiqyaslı müharibənin yenidən başlamasının qarşısını almağa yönəlmiş sülh təşəbbüslərini dəstəklədiyini bildirib.

Lavrov Rusiyanın Fars körfəzi regionunda kollektiv təhlükəsizliyin təmin edilməsinə dair yenilənmiş konsepsiyasını da gündəmə gətirərək regionun təhlükəsiz gələcəyi ilə bağlı qərarlarda sahilyanı dövlətlərin həlledici rol oynamalı olduğunu ifadə edib. O, konsepsiyanın Körfəz ölkələri ilə İraq və İordaniya kimi qonşuları arasında birbaşa dialoqa şərait yaratmağı hədəflədiyini qeyd edib.

Lavrov bu prosesin dəstəklənməsi məqsədilə Ərəb Dövlətləri Liqasının, İslam Əməkdaşlıq Təşkilatının və aidiyyəti ölkələrin müraciəti olarsa, Birləşmiş Millətlər Təşkilatının Təhlükəsizlik Şurasının daimi üzvlərinin də prosesə cəlb edilə biləcəyini bildirib.

Rusiyanın Körfəz Əməkdaşlıq Şurasının bütün üzvləri ilə dostluq münasibətlərinə önəm verdiyini vurğulayan Lavrov strateji dialoqun ölkələrin və xalqların rifahı naminə inkişaf etdirilməsinə sadiq olduqlarını bir daha təsdiqləyib.