Azərbaycan News Agency

Fransa Prezidenti Macron yeni M51.3 ballistik raketinin ilk buraxılışının həyata keçirildiyini bildirib.

Macron sosial media hesabında paylaşım edərək çoxməqsədli Auvergne freqatında olarkən Le Vigilant nüvə ballistik raket sualtı qayığından həyata keçirilən M51.3 ballistik raketinin ilk buraxılışını izlədiyini qeyd edib.

Bu cür təcrübəyə yalnız az sayda ölkənin malik olduğunu bildirən Macron uğurun əldə olunmasında rolu olan Fransanın Silahlanma üzrə Baş Direktorluğunun (DGA), Atom Enerjisi Komissiyasının (CEA), Ariane Group, Naval Group və Fransa Hərbi Dəniz Qüvvələrinin əməkdaşlarını təbrik edib.

Macron bu texniki uğurun Fransanın nüvə çəkindirməsinin etibarlılığını göstərdiyini bildirərək, “Azad olmaq üçün qorxu yaratmaq lazımdır. Qorxu yaratmaq üçün isə güclü olmaq lazımdır”, - deyib.

Macron 2017-ci ildən etibarən Fransanın müdafiə vasitələrini qarşıdakı onilliklər üçün yeniləmə prosesinə başladığını bildirərək, silahlı qüvvələrin büdcəsinin 10 il ərzində iki dəfə artacağını qeyd edib.

Gələcəyin strateji sualtı qayıqlarının tikinti mərhələsində olduğunu bildirən Macron hava çəkindirmə komponentini təchiz edəcək strateji, hipersəsli və manevr qabiliyyətli raket proqramının da bu il başladıldığını açıqlayıb.

Macron Fransanın nüvə çəkindirməsinin ölkəni qoruduğunu və qorumağa davam edəcəyini bildirib.