Azərbaycan News Agency

Ukraynanın xarici işlər naziri Andriy Sıbiha sosial media hesabında paylaşım edərək Danimarkanın xarici işlər naziri Lars Lökke Rasmussen ilə iki ölkə arasındakı tərəfdaşlığı müzakirə etdikləri görüş keçirdiyini açıqlayıb.

Sıbiha Danimarkanın Ukraynanın müdafiə sənayesinə yatırdığı investisiyalara görə Rasmussenə təşəkkür etdiyini bildirib. O, həmçinin Birləşmiş Ərəb Əmirliklərində (BƏƏ) keçirilməsi planlaşdırılan görüşdən əvvəl və sonra sıx koordinasiya şəraitində işləmək barədə razılığa gəldiklərini qeyd edib.

Ukrayna üçün ədalətli sülh istədiyini vurğulayan Sıbiha paylaşımında deyib: "Şimali Avropa ölkələri ən yaxın müttəfiqlərimiz sırasındadır və onların Ukraynaya dəstək sahəsində aparıcı rolunu yüksək qiymətləndiririk. Ortaq məqsədimiz dəyişməzdir: Ukrayna üçün ədalətli və davamlı sülh, bütün Avropa üçün daha çox təhlükəsizlik. Həmçinin qış yaxınlaşarkən Rusiyanın enerji sistemimizə qarşı fasiləsiz hücumları barədə Larsı məlumatlandırdım. Ukraynanın hava hücumundan müdafiəsinin və enerji sahəsində dayanıqlığının gücləndirilməsini, eləcə də təcavüzkara qarşı təzyiqin artırılmasını müzakirə etdik."

Sıbiha daha sonra Danimarka və Ukraynanın daha güclü və daha təhlükəsiz Avropa naminə birgə fəaliyyətini davam etdirəcəyini bildirib.