Azərbaycan News Agency

İsrailin Baş naziri Benyamin Netanyahu ölkə üzrə səfərləri zamanı vətəndaşlarla görüşdüyünü və onların tələblərini dinlədiyini bildirərək qarşıdan gələn seçkilərlə bağlı açıqlamalar verib.

Vətəndaşların ölkənin gələcəyi ilə bağlı narahatlıqlarını, güclü, təhlükəsiz və firavan İsrail arzusunu gördüyünü bildirən Netanyahu deyib: “Sizin sevginiz mənə güc verir və sizin üçün çalışmağa davam etməkdə qərarlıyam.”

Seçkilərin ölkənin gələcəyi baxımından kritik əhəmiyyət daşıdığını iddia edən Netanyahu deyib: “Bu seçkilər gələcəyimiz üçün həlledicidir: Ya sağ, ya da Fələstin.”

Netanyahu alternativ hesab etdiyi siyasi mənzərə barədə isə bildirib: “Ya bizim güclü sağçı hökumətimiz, ya da Eyzenkotun ərəb partiyaları, Yair Qolan, Liberman və Bennettlə quracağı solçu hökumət.”

ABŞ Prezidenti Donald Trampın səlahiyyət müddətinin bitməsinə iki il qaldığını qeyd edən Netanyahu bu dövrün bütün cəbhələrdə mühüm hədəfləri tamamlamaq üçün əlverişli vaxt olduğunu bildirib.

Seçki yarışının olduqca gərgin və bərabər səviyyədə keçdiyini iddia edən Netanyahu deyib: “Qələbə qazanmaq üçün sevgi və dəstək seçki qutularında verilən səslərə çevrilməlidir.”

Vətəndaşları ailələri və dostları ilə danışmağa, səsvermədə iştirak etməyə çağıran Netanyahu bildirib: “Birlikdə qalib gələcəyik. Uşaqlarımız üçün, gələcəyimiz üçün, İsrail Dövləti üçün.”