Azərbaycan News Agency

Pakistanın Baş nazirinin müavini və xarici işlər naziri Məhəmməd İshaq Dar Pakistan Mədən İnvestisiya Forumu 2026-nın açılışında etdiyi çıxışda ölkənin mineral ehtiyatlarını iqtisadi transformasiyanın əsas amillərindən biri kimi qiymətləndirib.

Forumun 60-dan çox ölkədən iştirakçıları bir araya gətirdiyini bildirən Dar Pakistanın mis, qızıl, dəmir filizi, xromit, qurğuşun, sink, kömür, daş duz və mərmər kimi müxtəlif mineral ehtiyatlara malik olduğunu qeyd edib.

Dar ölkənin məqsədinin yalnız faydalı qazıntıları xammal şəklində çıxarıb ixrac etmək olmadığını, Pakistan daxilində emal, saflaşdırma və istehsal imkanlarını inkişaf etdirmək olduğunu bildirib. Bu istiqamətdə mədənçiliyə, texnologiyaya, emal müəssisələrinə, enerjiyə, nəqliyyata və logistikaya investisiya qoyulmasının vacibliyini vurğulayıb.

Dar qlobal miqyasda təmiz enerjiyə, elektrikli nəqliyyat vasitələrinə, batareya ilə enerji saxlanmasına və qabaqcıl texnologiyalara keçidin misə və digər kritik minerallara tələbatı artırdığını bildirərək Pakistanın beynəlxalq mineral təchizat zəncirlərində etibarlı tərəfdaşa çevrilə biləcəyini qeyd edib.

Dar Bəlucistandakı Reko Diq mis-qızıl layihəsinin ölkənin mineral potensialını nümayiş etdirən mühüm investisiyalardan biri olduğunu bildirib. O, federal hökumətin əyalət hökumətləri ilə koordinasiya, investisiya proseslərinin asanlaşdırılması və beynəlxalq əməkdaşlığın gücləndirilməsi istiqamətində çalışdığını qeyd edib.

Dar həmçinin mədən investisiyalarının yerli məşğulluğu, peşə bacarıqlarının inkişafını və regional tərəqqini dəstəkləməli olduğunu vurğulayaraq yerli icmaların layihələrdə iştirakının və hüquqlarının qorunmasının əhəmiyyətinə diqqət çəkib.