Azərbaycan News Agency

Pakistanın Baş nazirinin müavini və xarici işlər naziri, senator Məhəmməd İshaq Dar İslamabadda Avropa İttifaqının daxili işlər və miqrasiya üzrə komissarı Maqnus Brunner ilə görüşüb.

Pakistan Xarici İşlər Nazirliyinin açıqlamasına görə, Dar Pakistan ilə Avropa İttifaqı arasında son təmasları xatırladaraq münasibətlərdəki müsbət dinamikadan məmnunluğunu ifadə edib. Görüşdə 2019-cu il Pakistan-Aİ Strateji Əməkdaşlıq Planının əsas istiqamətlərindən biri olan miqrasiya və mobillik sahələrində əməkdaşlığın gücləndirilməsi məsələsi nəzərdən keçirilib.

Pakistanın qeyri-qanuni miqrasiyanın qarşısının alınması, miqrant qaçaqmalçılığı və insan alverinə qarşı mübarizə istiqamətində gördüyü işlərə diqqət çəkən Dar bu səylərin pakistanlı ixtisaslı işçilər və peşəkar mütəxəssislər üçün qanuni miqrasiya imkanlarının artırılması ilə dəstəklənməli olduğunu vurğulayıb.

Brunner isə Pakistanın qeyri-qanuni miqrasiyaya qarşı mübarizədə əldə etdiyi irəliləyişi yüksək qiymətləndirərək qanuni miqrasiya yollarının genişləndirilməsi üçün imkanların mövcud olduğunu bildirib.

Dar Pakistanın Avropa İttifaqı ilə tərəfdaşlığını daha da gücləndirmək əzmini bir daha təsdiqləyib və Brunnerin səfərinin hər iki tərəf üçün konkret nəticələr verəcəyinə ümid etdiyini ifadə edib.