Azərbaycan News Agency

Pakistan Xarici İşlər Nazirliyinin açıqlamasına görə, Pakistan və Latviya arasında ikitərəfli siyasi məsləhətləşmələrin yeddinci raundu onlayn formatda keçirilib.

Pakistan nümayəndə heyətinə Avropa məsələləri üzrə əlavə katib, səfir Ayesha Ali, Latviya nümayəndə heyətinə isə siyasi məsələlər üzrə direktor və Xarici İşlər Nazirliyinin dövlət katibinin müavini, səfir Juris Poikāns rəhbərlik edib.

Danışıqlarda ikitərəfli münasibətlər, ticarət və investisiya, təhsil, informasiya və kommunikasiya texnologiyaları, konsulluq məsələləri və xalqlar arasında əlaqələr nəzərdən keçirilib. Birləşmiş Millətlər Təşkilatı çərçivəsində əməkdaşlığın da müzakirə olunduğu görüşlərdə iki ölkənin 2026-cı il ərzində BMT Təhlükəsizlik Şurasında eyni vaxtda üzvlüyü çərçivəsində əməkdaşlığa diqqət yetirilib.

Tərəflər həmçinin beynəlxalq sülh və təhlükəsizlik, çoxtərəfli əməkdaşlıq, regional və qlobal hadisələrlə bağlı fikir mübadiləsi aparıblar. İki ölkə ikitərəfli təmasların mövcud dinamikasının qorunması və ortaq maraq doğuran sahələrdə sıx koordinasiyanın davam etdirilməsi barədə razılığa gəlib.