Azərbaycan News Agency

Pakistan Xarici İşlər Nazirliyi Pakistan və Yeni Zelandiya arasında siyasi məsləhətləşmələrin və Birgə Ticarət Komitəsinin iclaslarının Vellinqtonda keçirildiyini bildirib. Avqustun 6-da keçirilən görüşlərin iki ölkə arasındakı münasibətlərin inkişafı baxımından mühüm addım olduğu qeyd edilib.

Görüşlərdə ikitərəfli münasibətlərlə yanaşı, iqtisadi inkişaf, ticarət, investisiya, təhsil, texnologiya, enerji, kənd təsərrüfatı və xidmətlər sahələrində əməkdaşlığın artırılması müzakirə olunub. Tərəflərin həmçinin regional və beynəlxalq proseslər, eləcə də çoxtərəfli platformalarda əməkdaşlıq məsələləri ətrafında fikir mübadiləsi apardığı bildirilib.

Birgə Ticarət Komitəsi çərçivəsində kənd təsərrüfatı, heyvandarlıq, informasiya texnologiyaları, təhsil və xidmətlər sahələrində ticarət və investisiyaların artırılması, bazara çıxış imkanlarının yaxşılaşdırılması və dayanıqlı kənd təsərrüfatı sahəsində əməkdaşlığın gücləndirilməsi müzakirə edilib. Görüşlərin mühüm nəticələrindən biri kimi Pakistan və Yeni Zelandiya arasında Təhsil Əməkdaşlığına dair Razılaşmanın imzalandığı və bunun təhsil sahəsində əməkdaşlığın inkişafına töhfə verəcəyi qeyd olunub.