Azərbaycan News Agency

Xorvatiyanın Baş naziri Andrej Plenkovic Cənubi Koreya Milli Assambleyasının sədri Cho Jeong-sik ilə Banski Dvori hökumət binasında görüşüb. Görüşdə iki ölkə arasında ticarətin artırılması, Cənubi Koreya investisiyalarının təşviqi, enerji, yaşıl texnologiyalar və nəqliyyat infrastrukturu sahələrində əməkdaşlıq müzakirə olunub.

Plenkovic görüşlə bağlı açıqlamasında iki ölkə arasında müdafiə əməkdaşlığının da inkişaf etdiyini bildirib. Bu çərçivədə müdafiə nazirlikləri arasında imzalanan anlaşma memorandumu və Cənubi Koreyanın Hanwha Aerospace şirkətindən K239 Chunmoo raket-artilleriya sistemi və CTM-X raketlərinin tədarükünə dair razılaşmaya toxunulub.

Plenkovic görüşdə aktual beynəlxalq təhlükəsizlik məsələlərinin də müzakirə edildiyini bildirərək, Ukraynaya dəstəyin davam etdirilməsinin və Avropa ilə Hind-Sakit okean tərəfdaşlarının sülhün, təhlükəsizliyin və beynəlxalq hüquqa əsaslanan nizamın qorunması üçün əməkdaşlıq etməsinin əhəmiyyətini vurğulayıb.