Azərbaycan News Agency

Ukraynanın xarici işlər naziri Andrii Sybiha DTT-nin baş direktoru Ngozi Okonjo-Iweala ilə görüşündə Rusiyanın Ukraynada mülki şəxslərə və mülki infrastruktura qarşı hücumlarını gündəmə gətirib. Sybiha Pryluky şəhərində yaşayış binasına edilən və aralarında uşaqların da olduğu insanların həyatını itirdiyi hücuma toxunaraq, Rusiyanın mülki əhalini hədəf aldığını bildirib.

Ukraynanın qaydalara əsaslanan çoxtərəfli ticarət sistemini dəstəklədiyini bildirən Sybiha Rusiyanın Qara dənizdə mülki gəmilərə, dənizçilərə və Ukrayna limanlarına hücumlarının qlobal ərzaq təchizatı zəncirlərini təhdid etdiyini qeyd edib. Sybiha dəniz nəqliyyatının təhlükəsizliyinin gecikdirilmədən bərpa edilməli olduğunu vurğulayıb.

Ukrayna kənd təsərrüfatı məhsulları üçün yeni bazarların açılmasının əhəmiyyətinə diqqət çəkən Sybiha müharibə zamanı təcrübə qazandıqları məsafədən yoxlama təcrübələrinin kənd təsərrüfatı ticarətini daha dayanıqlı edə biləcəyini bildirib. Ukraynanın Avropa İttifaqı, Böyük Britaniya və Kanada ilə bu təcrübələrin tətbiqi barədə razılığa gəldiyini deyən Sybiha DTT çərçivəsində məsafədən yoxlama və təftişlərin aparılması, eləcə də nəticələrinin tanınması üçün beynəlxalq standartın yaradılmasını təklif edib.

Sybiha təşəbbüsə DTT üzvləri arasında dəstək qazanılması üçün Okonjo-Iwealanın töhfəsini gözlədiklərini bildirib.