Azərbaycan News Agency

Xorvatiyanın Baş naziri Andrey Plenkoviç Qərbi Balkan ölkələrinin Avropa perspektivləri və regional əməkdaşlıq məsələlərinin müzakirə edildiyi Berlin Prosesi Sammitində iştirak etdiklərini bildirib.

Monteneqronun Sveti Stefan şəhərində keçirilən sammitin builki mövzusunun “Hərəkətdə olan region. Dəyişikliyə sahib çıxmaq: Ortaq Avropa gələcəyi üçün etimad qurmaq” olduğunu qeyd edən Plenkoviç görüşün Qərbi Balkan ölkələri arasındakı münasibətlər və Avropaya inteqrasiya baxımından əhəmiyyətini vurğulayıb.

Berlin Prosesinin Qərbi Balkan ölkələri arasında iqtisadi inteqrasiyanı və müxtəlif sahələrdə əməkdaşlığı inkişaf etdirən dəyərli platforma olduğunu bildirən Plenkoviç Xorvatiyanın qonşularının Avropa gələcəyini strateji prioritet hesab etdiyini qeyd edib.

Plenkoviç Xorvatiyanın Avropa İttifaqının genişlənməsini dəstəkləməyə davam edəcəyini bildirərək bu prosesin ölkələrin fərdi irəliləyişlərinə, islahatların həyata keçirilməsinə və mehriban qonşuluq münasibətlərinə əsaslanmalı olduğunu vurğulayıb.