Azərbaycan News Agency

Qətər Səudiyyə Ərəbistanına məxsus SIDR tankerinin Hörmüz boğazından keçərkən İran tərəfindən hədəfə alınmasını və hadisə nəticəsində ekipaj üzvləri arasında ölənlərin olmasını kəskin şəkildə pisləyib.

Qətər Xarici İşlər Nazirliyinin bəyanatında hücumun beynəlxalq hüquq normalarının, dəniz naviqasiyası azadlığının və Birləşmiş Millətlər Təşkilatı Təhlükəsizlik Şurasının 2817 saylı qətnaməsinin açıq şəkildə pozulması olduğu bildirilib.

Nazirlik Hörmüz boğazının təzyiq vasitəsi kimi istifadə edilməsini qəti şəkildə rədd etdiyini açıqlayıb.

Bəyanatda boğazın qeyd-şərtsiz yenidən açılmasına çağırış edilib və bu həyati əhəmiyyətli su yolu ilə sərbəst keçidin mübahisəsiz prinsip olduğu vurğulanıb.

Hörmüz boğazının bağlı qalmasının region ölkələrinin həyati maraqlarını və qlobal iqtisadiyyatı risk altına qoyduğu bildirilib.

Qətər Xarici İşlər Nazirliyi İranın qardaş ölkələrin əmlakına qarşı hücumlarının dayandırılmalı olduğunu bəyan edib.

Bəyanatda Qətərin Səudiyyə Ərəbistanı ilə tam həmrəylik içində olduğu və Krallığın öz əmlakını qorumaq məqsədilə görəcəyi bütün tədbirləri dəstəklədiyi qeyd olunub.