Azərbaycan News Agency

Qətər Özbəkistanın paytaxtı Daşkənddə 7–9 sentyabr tarixlərində keçirilən “Özbəkistanda İslam Mədəni İrsi və Onun Qlobal Elmdə Rolu” adlı beynəlxalq konfransda iştirak edib.

Qətər Xarici İşlər Nazirliyinin açıqlamasına görə, konfrans elmi və mədəni qarşılıqlı əlaqə vasitəsilə şərqşünaslıq və mədəniyyət araşdırmalarının inkişaf etdirilməsi, həmçinin sivilizasiyalar və mədəniyyətlər arasında dialoqun gücləndirilməsi məqsədilə təşkil olunub.

Qətər nümayəndə heyətinə Xarici İşlər Nazirliyinin baş katibi və Qətər Sivilizasiyalar Alyansı Komitəsinin sədri Ahmed bin Hassan Al Hammadi rəhbərlik edib. Konfransda Qətərlə yanaşı Türkiyə, İtaliya, İordaniya, İraq, Əlcəzair, Misir və Mərakeşdən alimlər, ekspertlər və tədqiqatçılar iştirak ediblər.

Al Hammadi konfransdakı çıxışında tədbirin Qətərin 2023–2027-ci illər üçün Sivilizasiyalar Alyansı planında vurğulanan Mədəni Diplomatiya Proqramı çərçivəsində keçirildiyini bildirib.

Proqramın dünya miqyasında elm və mədəniyyətin inkişafında fəal rol oynamış İslam şəhərlərinin tanıdılmasını hədəflədiyini deyən Al Hammadi konfransın Qətər Sivilizasiyalar Alyansı Komitəsi, Qətər Universiteti və Daşkənd Dövlət Şərqşünaslıq Universiteti arasında elmi əməkdaşlıq və tərəfdaşlığın nəticəsi olduğunu bildirib.

Al Hammadi konfrans çərçivəsində Xarəzmi, Biruni, İbn Sina və İmam Buxari kimi alimlərin qoyduğu elmi irsin və bu irsin riyaziyyat, mühəndislik, cəbr, Yer elmləri, kimya, tibb, fəlsəfə və İslam araşdırmaları kimi sahələrdə qlobal elmin inkişafına təsirinin nəzərdən keçirildiyini bildirib.

Mədəni diplomatiyanın sivilizasiyalar arasında dialoq və əməkdaşlığı, xalqlar arasında yaxınlaşmanı və ortaq mədəni irsin gücləndirilməsini dəstəklədiyini vurğulayan Al Hammadi bu cür tədbirlərin ölkələr arasında müxtəlif sahələrdə yeni əməkdaşlıq imkanları yaratdığını qeyd edib.

Al Hammadi son illərdə Qətərlə Özbəkistan arasında mühüm mədəni fəallığın müşahidə olunduğunu bildirərək 2024-cü ilin fevralında Dohada Özbək Mədəniyyəti Həftəsinin, 2024-cü ilin oktyabrında isə Daşkənddə Qətər Mədəniyyəti Həftəsinin keçirildiyini xatırladıb.

Qətərin Özbəkistandakı İslam Sivilizasiyası Mərkəzinin açılışında da geniş iştirak etdiyini deyən Al Hammadi mərkəzin İslam sivilizasiyasının və region alimlərinin bəşəriyyətin tərəqqisinə töhfələrini nümayiş etdirməyi, əlyazma irsini qorumağı, elmi araşdırmaları və sivilizasiyalararası dialoqu təşviq etməyi hədəfləyən mühüm mədəni və elmi layihələrdən biri olduğunu bildirib.

Al Hammadi konfransın Özbəkistanın İslam mədəni irsinin və bu irsin müasir dünyadakı elmi inkişaflara töhfəsinin üzə çıxarılmasına kömək edəcək elmi təklif və tövsiyələr irəli sürəcəyinə ümid etdiyini bildirib.