Azərbaycan News Agency

Qətərin Baş naziri və xarici işlər naziri Şeyx Məhəmməd bin Əbdürrəhman bin Casim Al Sani və Fransanın Avropa və xarici işlər naziri Jan-Noel Barro Qətər və Fransa arasında dördüncü strateji dialoq görüşünə birgə sədrlik ediblər.

Qətər Xarici İşlər Nazirliyinin açıqlamasına görə, oktyabrın 21-də Dohada keçirilən görüşdə iki ölkə arasında münasibətlərin və strateji tərəfdaşlığın siyasi, diplomatik, iqtisadi, investisiya, müdafiə, təhlükəsizlik, təhsil, səhiyyə, mədəniyyət və idman sahələrində inkişaf etdirilməsi məsələləri müzakirə olunub. Humanitar yardım və inkişaf sahəsində əməkdaşlıq məsələləri də nəzərdən keçirilib.

Görüşdə 2025-ci ilin iyun ayında keçirilmiş üçüncü strateji dialoq görüşündən bəri əməkdaşlığın müxtəlif sahələrində əldə olunan irəliləyişlər qiymətləndirilib və regional hadisələr də gündəmə gətirilib.

Tərəflər sülhün təmin olunmasına yönəlmiş səyləri, xüsusilə Fələstin məsələsini və Qəzza zolağındakı vəziyyəti müzakirə ediblər. Livan, Sudan və Afrika Buynuzundakı hadisələrlə yanaşı, İranla bağlı proseslər və Hörmüz boğazındakı gərginliyin regional təhlükəsizliyə və dəniz nəqliyyatının sərbəst hərəkətinə təsirləri də qiymətləndirilib.

Görüşdə həmçinin Qətərin münaqişələrin diplomatik yollarla həlli, gərginliyin azaldılması və regional təhlükəsizliklə sabitliyin gücləndirilməsi istiqamətində vasitəçilik səyləri müzakirə olunub. Tərəflər qarşılıqlı maraq doğuran regional və beynəlxalq məsələlər üzrə koordinasiya və məsləhətləşmələrin davam etdirilməsinin vacibliyini vurğulayıblar.