Azərbaycan News Agency

Xorvatiyanın xarici və Avropa işləri naziri Qordan Qrliç Radman Ukraynanın Dnipro şəhərindəki dəmir yolu stansiyasına Rusiyanın pilotsuz uçuş aparatı ilə həyata keçirdiyi hücum nəticəsində çox sayda mülki şəxsin həyatını itirməsi ilə bağlı başsağlığı mesajı yayımlayıb.

İnsan tələfatından dərin kədər hissi keçirdiyini bildirən Radman deyib: “Dniproda dəmir yolu stansiyasına Rusiyanın reaktiv mühərrikli pilotsuz uçuş aparatı ilə həyata keçirdiyi hücumun çox sayda günahsız insanın həyatına son qoyduğunu dərin kədərlə öyrəndim.”

Radman Ukrayna hökumətinə, həlak olanların və yaralananların ailələrinə başsağlığı verərək, yaralıların tam və mümkün qədər tez sağalmasını arzulayıb. Xorvatiyanın Ukraynaya dəstəyini davam etdirəcəyini vurğulayan Radman bildirib: “Xorvatiya Ukrayna və onun xalqı ilə həmrəy olmağa davam edir, Ukraynanın suverenliyinə, azadlığına və ədalətli sülhə qətiyyətli dəstəyini davam etdirir.”