Azərbaycan News Agency

Ukraynanın xarici işlər naziri Andriy Sıbiha BƏƏ-nin Baş nazirinin müavini və xarici işlər naziri Şeyx Abdullah bin Zayed Əl Nəhyan ilə məhsuldar görüş keçirdiyini açıqlayıb. Sıbiha sosial media hesabında etdiyi paylaşımda Əbu-Dabidə keçiriləcək görüşdən əvvəl sülh səylərinin gələcəyi ilə bağlı fikir mübadiləsi apardıqlarını bildirib.

BƏƏ-nin sülh prosesinin irəliləməsində oynadığı mühüm rola görə təşəkkür edən Sıbiha Ukraynanın müharibəyə son qoyulması ilə bağlı mövqeyini bir daha təkrarlayıb. Sıbiha atəşkəsə nail olunması və gərginliyin azaldılmasına yönəlmiş müxtəlif həll yollarına açıq olduqlarını ifadə edib.

Görüşdə həmçinin regional və qlobal təhlükəsizlik problemləri, naviqasiya azadlığı və beynəlxalq təşkilatlarla əməkdaşlıq məsələləri müzakirə olunub.