Azərbaycan News Agency

Ukraynanın xarici işlər naziri Andrii Sıbiha açıqlamasında Rusiyanın Ukraynaya hücumlarından sonra Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaja Kallas ilə telefon danışığı apardığını bildirib.

Sıbiha söhbət zamanı Rusiyanın hücumlarının nəticələrini və Ukraynanın xüsusilə ballistik raketlərə qarşı hava hücumundan müdafiəsinin gücləndirilməsi zərurətini müzakirə etdiklərini qeyd edib.

Rusiyanın ballistik raket istehsalına və bu istehsalı dəstəkləyən strukturlara qarşı daha sərt sanksiyaların tətbiq edilməli olduğunu bildirən Sıbiha Ukraynanın hava hücumundan müdafiə imkanlarının artırılmasına çağırıb.

Sıbiha həmçinin görüşdə Rusiyanın Ukraynanın dəniz dəhlizinin fəaliyyətini pozmaq cəhdlərinin müzakirə edildiyini bildirib, ərzaq təhlükəsizliyinin və Ukraynanın ərzaq ixracının qlobal bazarlara çatdırılmasının əhəmiyyətinə diqqət çəkib.

Sıbiha Birləşmiş Millətlər Təşkilatının (BMT) Baş Assambleyasının yüksək səviyyəli həftəsi ərəfəsində ərzaq təhlükəsizliyi ilə bağlı birgə fəaliyyətlərin əlaqələndirildiyini və əlavə addımlar barədə razılığa gəlindiyini qeyd edib.