Azərbaycan News Agency

Estoniyanın xarici işlər naziri Marqus Tsahkna NATO-nun Baş katibi Mark Rutte ilə Estoniyanın paytaxtı Tallinndə görüşərək alyansın müdafiə imkanlarını və Ukraynaya hərbi dəstəyi müzakirə edib.

Görüşdən sonra açıqlama verən Tsahkna NATO-nun indiyədək müttəfiq ölkələrin ərazilərinin hər qarışını müdafiə etməyə hazır olduğunu ardıcıl şəkildə nümayiş etdirdiyini bildirərək deyib: “Bunun qarşıdakı illərdə də davam etməsini təmin etmək üçün bu gün Tallinndə Mark Rutte ilə artan müdafiə investisiyalarını real imkanlara necə çevirəcəyimizi və NATO-nun çəkindirmə və müdafiə gücünü necə qoruyacağımızı müzakirə etdik”.

Ukraynaya dəstəyin də müzakirə edildiyini qeyd edən Tsahkna bildirib: “Məqsədimiz ədalətli və davamlı sülh olmalıdır. Ukraynanın Rusiyanın təcavüzünə qarşı özünü müdafiə edə bilməsi üçün hərbi yardım davam etdirilməlidir”.

NATO-nun PURL mexanizminin əhəmiyyətini vurğulayan Tsahkna deyib: “NATO-nun PURL mexanizmi öz əhəmiyyətini qoruyur və Estoniya bu təşəbbüs vasitəsilə Ukraynaya əlavə 10 milyon avro töhfə verəcək”.