Azərbaycan News Agency

Ukrayna Xarici İşlər Nazirliyinin açıqlamasına görə, Səudiyyə Ərəbistanının Ciddə şəhərində, vəliəhd şahzadə Məhəmməd bin Salmanın qonaqpərvərliyi altında ABŞ və Ukrayna Ukraynada daimi sülhün bərpası üçün addımlar atdı.

Hər iki ölkənin nümayəndələri Ukrayna xalqının öz ölkəsini müdafiə etməkdə göstərdiyi cəsarəti yüksək qiymətləndirdi və daimi sülhə aparan bir prosesin başlanmasının vaxtının çatdığını qəbul etdilər.

Ukrayna nümayəndə heyəti, Prezident Trampa, ABŞ Konqresinə və Amerika xalqına sülhə doğru irəliləyişə töhfə verdikləri üçün dərin minnətdarlığını bir daha ifadə etdi.

Ukrayna, qarşılıqlı razılaşma əsasında uzadıla bilən və eyni zamanda Rusiya Federasiyası tərəfindən qəbul edilərək icra olunmalı olan müvəqqəti 30 günlük atəşkəs barədə ABŞ təklifini qəbul etməyə hazır olduğunu bildirdi.

ABŞ Rusiyaya bildirəcək ki, qarşılıqlı addımlar atmaq sülhə nail olmağın əsas açarıdır.

ABŞ, həmçinin Ukraynaya təhlükəsizlik yardımlarını yenidən başlamaq və kəşfiyyat məlumatlarının paylaşılmasına qoyulan fasiləni aradan qaldırmaq niyyətindədir.

Nümayəndə heyətləri müharibə əsirlərinin mübadiləsi, mülki məhbusların azad edilməsi və zorla köçürülən Ukrayna uşaqlarının geri qaytarılması daxil olmaqla, humanitar yardım səylərinin əhəmiyyətini müzakirə etdilər.

Hər iki tərəf Ukraynanın uzunmüddətli təhlükəsizliyini təmin etmək üçün danışıqlara dərhal başlamağa razılaşdı.

Sonda hər iki ölkənin liderləri Ukrayna iqtisadiyyatını inkişaf etdirmək, ABŞ yardımının xərclərini balanslaşdırmaq və Ukraynanın uzunmüddətli rifahını və təhlükəsizliyini təmin etmək məqsədilə Ukraynanın kritik mineral resurslarının inkişafına dair genişmiqyaslı bir sazişin ən qısa zamanda tamamlanması barədə razılığa gəldilər.