Azərbaycan News Agency

Ukrayna Xarici İşlər Nazirliyinin açıqlamasında Rusiyanın Zaporijya şəhərinə və bölgəyə qarşı bir sıra hava hücumları həyata keçirdiyi qeyd olunub. Açıqlamada azı 26 mülki şəxsin yaralandığı, yaralıların sayının arta biləcəyi bildirilib.

Hücumların çoxmənzilli binalara və fərdi yaşayış evlərinə, eləcə də bir təhsil müəssisəsinə və kritik infrastruktura ziyan vurduğu, müxtəlif nöqtələrdə yanğınların baş verdiyi bildirilib. Fövqəladə hallar üzrə qrupların dağıntılar altından insanları xilas etdiyi və könüllülərlə birlikdə ərazidə işlərini davam etdirdiyi qeyd olunub.

Açıqlamada mülki əhalinin yaşadığı ərazilərin hədəf alındığı vurğulanaraq, “Yaşayış evləri, məktəblər və gündəlik həyat məkanları yenidən hədəf alındı” ifadəsinə yer verilib. Ukrayna Xarici İşlər Nazirliyi müharibənin sona çatmasının yalnız güclü beynəlxalq reaksiya və məsul şəxslərin cavab verməsi ilə mümkün olduğunu vurğulayıb.