Azərbaycan News Agency

Avropa Komissiyasının Prezidenti Ursula fon der Lyayen iş dünyasının nümayəndələri ilə keçirdiyi səmərəli görüş və Avropa İttifaqının gələcəyə yönəlmiş iqtisadi yol xəritəsi barədə danışıb.

Görüşdən məmnunluğunu ifadə edən və ticarət strategiyalarına toxunan fon der Lyayen deyib: “Business Europe ilə çox faydalı müzakirələr apardıq. Avropanın rəqabət qabiliyyəti və məşğulluğu iki əsas istiqamətdə nəzərdən keçirildi. Sərhədlərimizdən kənarda ticarət əlaqələrimizi şaxələndirməyə davam etməliyik. Daha az asılılıq daha çox dayanıqlılıq deməkdir.”

Avropanın daxili bazar gücünün artırılması məqsədlərinə diqqət çəkən fon der Lyayen bildirib: “Öz daxilimizdə Avropanın sənaye bazasını gücləndirməyə davam etməliyik.”

İnvestisiya və innovasiyaların əhəmiyyətini vurğulayan fon der Lyayen sözlərini belə tamamlayıb: “Vahid Avropa, Vahid Bazar Yol Xəritəmiz vasitəsilə Avropanı investisiya qoymaq, innovasiya etmək və böyümək üçün ən yaxşı məkana çevirəcəyik.”