Azərbaycan News Agency

Ukrayna Prezidenti Zelenski Rusiyanın gecə saatlarında Ukraynanın müxtəlif bölgələrinə həyata keçirdiyi hücumlarla bağlı açıqlama verib.

Zelenski sosial media hesabında yaydığı açıqlamada hücumlarda ballistik raketlərlə yanaşı, təxminən 190 pilotsuz uçuş aparatından istifadə edildiyini bildirib. Hücumların əsas hədəfinin Kiyev və Kiyev vilayətindəki enerji infrastrukturu olduğunu qeyd edən Zelenski yaşayış binalarına da ziyan dəydiyini deyib.

Zelenski Kiyev vilayətində elektrik və su xidmətlərinin bərpası üçün fövqəladə hallar və təmir qruplarının işlərini davam etdirdiyini bildirib. O, İvankoviçidə ərzaq mağazasının pilotsuz uçuş aparatı ilə vurulduğunu və ərazidə yanğın baş verdiyini qeyd edib.

Zelenski Kiyevdə anbar binasının vurulması nəticəsində bir nəfərin həlak olduğunu bildirib. O, Jitomir, Nikolayev, Kirovoqrad və Rivne vilayətlərində kritik infrastruktura hücum edildiyini, Odessa, Sumı, Xarkov, Xerson və Çerkası vilayətlərində də ziyanın qeydə alındığını deyib.

Zelenski ölkə üzrə hücumlar nəticəsində 14 nəfərin yaralandığını və 5 nəfərin həlak olduğunu açıqlayıb, ölənlər arasında bir uşağın da olduğunu bildirib.

Zelenski Ukraynanın hava hücumundan müdafiə bölmələrinin ballistik raketlərin bir hissəsini zərərsizləşdirdiyini, lakin bəzi hücumların hədəflərinə çatdığını qeyd edib. Son günlər hava hücumundan müdafiə üçün yeni dəstək paketlərinin açıqlandığını deyən Zelenski müttəfiq ölkələrə hava hücumundan müdafiə raketləri və Ukraynanın hava məkanının qorunmasına göstərdikləri dəstəyə görə təşəkkür edib.