Azərbaycan News Agency

Ukrayna Prezidenti Volodimir Zelenski Müdafiə Qərargahının iclasında elektron müharibə imkanları və bu sistemlərin infrastrukturun qorunmasında istifadəsi ilə bağlı hesabatlar aldığını bildirib.

Zelenski elektron müharibə sistemlərinin Rusiya tərəfindən istifadə olunan Şahed tipli pilotsuz uçuş aparatlarının əhəmiyyətli hissəsinin zərərsizləşdirilməsinə imkan yaratdığını qeyd edərək, Ukrayna Silahlı Qüvvələrinə və müdafiə sənayesi istehsalçılarına mövcud tətbiqlərin genişləndirilməsi ilə bağlı tapşırıqlar verildiyini bildirib.

Ukrayna Müdafiə Kəşfiyyatının Rusiyanın bu il və gələn il üçün texnoloji prioritetləri, eləcə də silah istehsalında istifadə olunan kritik komponent və avadanlıqların tədarükü barədə hesabat təqdim etdiyini bildirən Zelenski bu məlumatlar əsasında yeni sanksiya paketlərinin hazırlanacağını qeyd edib.

Zelenski Müdafiə Kəşfiyyatının təkliflərini Nazirlər Kabinetinə və Milli Təhlükəsizlik və Müdafiə Şurasına təqdim edəcəyini, həmçinin sanksiyaların tərəfdaş ölkələrin yurisdiksiyaları arasında əlaqələndirilməsi istiqamətində işlərin davam etdiyini bildirib.

Zelenski gələn il Ukrayna qüvvələrinin uzaqmənzilli pilotsuz uçuş aparatları ilə təmin olunmasına dair əsas vəzifələrin də müəyyən edildiyini bildirərək, əsas meyarın Rusiyanın hücumlarına cavab vermək imkanının yaradılması olduğunu deyib.