Azərbaycan News Agency

CCTV-nin xəbərinə görə, ABŞ mediası Vaşinqton və Tehranın müharibəni başa çatdırmağa yönəlmiş razılaşmaya yaxınlaşdığını iddia edib. İran tərəfi isə ABŞ təklifinin hələ də araşdırıldığını və cavabın Pakistan vasitəsilə çatdırılacağını açıqlayıb.

ABŞ mediasında yer alan xəbərlərə görə, Amerika Birləşmiş Ştatları ilə İran arasında davam edən gərginliyi sona çatdırmağa yönəlmiş razılaşmanın əldə olunmasına yaxın olunduğu iddia edilib.

Axios tərəfindən yayımlanan və ABŞ rəsmilərinə əsaslanan xəbərdə tərəflərin müharibəni bitirmək və nüvə danışıqları üçün çərçivə yaratmaq məqsədilə bir səhifəlik anlaşma memorandumu üzərində çalışdığı bildirilib.

Xəbərə görə, mümkün razılaşma çərçivəsində İran uranın zənginləşdirilməsini dayandırmağa razı olacaq, ABŞ isə sanksiyaları ləğv edəcək. Həmçinin tərəflərin Hörmüz boğazı üzərindən keçidlərə qoyulan məhdudiyyətləri aradan qaldırmasının da gündəmdə olduğu qeyd olunub.

Uranın zənginləşdirilməsinə dair moratoriumun müddətinin isə hələ dəqiqləşmədiyi, bunun 12 ilə 15 il arasında ola biləcəyi bildirilib. Xəbərdə İranın ilkin olaraq 5 il, ABŞ-ın isə 20 il təklif etdiyi qeyd edilib.

Hələlik rəsmi razılaşma əldə olunmasa da, tərəflərin müharibənin başlanmasından bəri ən yaxın nöqtəyə gəldiyi bildirilib.

İran tərəfi isə bu iddialara ehtiyatla yanaşıb. Yarı rəsmi Fars Xəbər Agentliyi İranın ABŞ-dan gələn son mesaja hələ cavab vermədiyini bildirib. Mesajın danışıqlarda vasitəçi rolunu oynayan Pakistan vasitəsilə çatdırıldığı qeyd olunub.

İran Xarici İşlər Nazirliyinin sözçüsü İsmail Bekayi təklifin araşdırıldığını və qiymətləndirmədən sonra cavabın Pakistan vasitəsilə çatdırılacağını açıqlayıb.

Digər tərəfdən, İran parlamentinin Milli Təhlükəsizlik və Xarici Siyasət Komissiyasının sözçüsü İbrahim Rezai sosial media paylaşımında bu xəbərin “ABŞ-ın arzu siyahısı” olduğunu müdafiə edib. Rezai bildirib ki, ABŞ müharibə yolu ilə əldə edə bilmədiyi nəticələri danışıqlarda da əldə edə bilməyəcək.