Azərbaycan News Agency

ABŞ-ın Türkiyədəki səfiri Tom Barrack Mədəniyyət və Turizm naziri Mehmet Nuri Ersoy ilə görüşərək turizm, mədəni irsin qorunması və iki ölkə arasında əməkdaşlığı müzakirə edib.

Görüşdən sonra Barrack bildirib ki, Türkiyənin zəngin tarixi, mədəni irsi, müxtəlifliyi, qonaqpərvərliyi və strateji coğrafi mövqeyi turizm baxımından misilsiz üstünlüklərə malikdir.

Barrack nazir Ersoyun bu dəyərləri qorumaq və Türkiyənin beynəlxalq turizmdəki mövqeyini gücləndirmək istiqamətində gördüyü işləri yüksək qiymətləndirdiyini bildirərək, onun liderliyini "təqdirəlayiq" adlandırıb.

ABŞ ilə Türkiyə arasında diplomatik münasibətlərin 100 illiyinin yaxınlaşdığını xatırladan Barrack vurğulayıb ki, Türkiyənin tarixi irsinin qorunması və ortaq mədəni təşəbbüslərin inkişafı sahəsində əməkdaşlıq iki ölkə arasında nümunəvi tərəfdaşlıq təşkil edir.