Azərbaycan News Agency

CCTV-nin məlumatına görə, Qəzza zolağında Mülki Müdafiə qrupları dağıdılmış binaların dağıntıları altında qaldığı güman edilən yüzlərlə insanın cəsədini tapmaq üçün axtarış-xilasetmə işlərini davam etdirir.

Lakin ağır texnika və texniki avadanlıq çatışmazlığı əməliyyatların gedişini ciddi şəkildə çətinləşdirir.

İsrailin Qəzzəyə hücumları nəticəsində ən çox dağıntıya məruz qalan ərazilərdən biri olan Sabra məhəlləsində onlarla ev tamamilə dağılıb, çoxlu sayda insan dağıntılar altında qalıb.

Əbu Şəriə ailəsi 200-dən çox qohumunu itirdiyini, onların əksəriyyətinin isə hələ də dağıntılar altında olduğunu bildirib.

Ailə üzvlərindən İbrahim Əbu Şəriə deyib: "Buradakı bütün ailələr eyni ağrını yaşayır. Təxminən üç ildir ki, hər gün bura gələrək yaxınlarımızı yad edirik. Hətta qalıqlar çıxarılsa belə, onların kimə aid olduğunu müəyyən etmək çox vaxt mümkün olmur."

Qəzza Mülki Müdafiəsinin sözçüsü Mahmud Basal bildirib ki, demək olar hər dağıdılmış binanın altında həlak olanlar var və ağır texnika çatışmazlığı işləri xeyli ləngidir. O deyib: "Hazırda cəmi bir ekskavatorumuz var. Dağıntıların təmizlənməsi və cəsədlərə çatmaq üçün təcili olaraq daha çox ağır texnikaya ehtiyacımız var."

Beynəlxalq Qırmızı Xaç Komitəsi (ICRC) əməliyyatlara yanacaq və avadanlıq dəstəyi verdiyini açıqlayıb. Qəzzədə fəaliyyət göstərən ICRC sözçüsü Amani Al Naouq isə minlərlə ailənin illərdir itkin düşmüş yaxınlarını gözlədiyini vurğulayıb.

Al Naouq bildirib ki, Mülki Müdafiə qruplarına dəstək ailələrin yaxınlarını dəfn etməsi və yas prosesini başa çatdırması üçün böyük əhəmiyyət daşıyır.

BMT-nin məlumatına görə, Qəzzədə yaşayış evlərinin 90 faizdən çoxu zədələnib və ya dağılıb.

BMT həmçinin bölgədə həyatını itirən fələstinlilərin sayının 73 mini keçdiyini bildirib. Fələstin insan hüquqları təşkilatları isə dağıntılar altında hələ də 10 mindən çox insanın itkin düşdüyünü təxmin edir.